Dağlıq Qrabağ münaqişəsinin həll olunmamış qalması regional təhlükəsizliyə təhdiddir. "Baki-Baku.az" erməni mediasına istinadən xəbər verir ki, bu fikri Ermənistanın xarici işlər naziri Ara Ayvazyan ölkə parlamentinin Avrasiya İnteqrasiyası Daimi Komisiyasının bu gün keçirilmiş iclasındakı çıxışı zamanı deyib.
A.Ayvayzan bildirib ki, Azərbaycanın güc yolu ilə Qarabağın bir hissəsini ələ keçirməsi münaqişənin həlli sayıla bilməz. Yalnız siyasi və razılaşdırılmış, bütün tərəflərin mənafelərinin nəzərə alındığı qərar və Qarabağın yekun statusunun müəyyənləşdirilməsi konfliktə son qoya bilər.
Ermənistan XİN rəhbəri ölkəsinin danışıqların bərpasına hazır olduğunu deyib. O, eyni zamanda bunun üçün sülhə zəmin yaradan mühitin olmasının vacibliyi üzərində dayanıb. Lakin belə bir mühitin olmamasına görə Azərbaycanı günahlandırıb və bildirib ki, Azərbaycan sülh yolu ilə getməyə hazırlıq nümayiş etdirmir. Ayvazyan söylədiklərinin isbatı kimi ölkəmizin hərbi əsir, girov və digər şəxsləri guya geri qaytarmamasını vurğulayıb.
Bütün bunlara baxmayaraq A.Ayvazyan bildirib ki, Ermənistanın mövqeyi dəyişməzdir - ölkə ATƏT-in Minsk Qrupunun həmsədrlərinin hazırkı formatını dəstəkləyir. "Biz ATƏT-in Minsk Qrupundan münaqişənin sülh yolu ilə həlli prosesinin təmin olunması üçün təsirli həmsədrlik gözləyirik", - deyə Ayvazyan fikrini tamamlayıb.
