Ermənistan ombudsmanı Arman Tatoyan Azərbaycan hakimiyyətini sərhədyanı bölgələrdə yaşayan erməni əhalinin hüquqlarını pozduğuna dair bəyanat yayıb.
"Baki-Baku.az"ın erməni mediasına istinadən xəbərindən belə anlaşılır ki, Tatoyanı qəzəbləndirən Azərbaycan və ingilis dilində yazılmış "Azərbaycana xoş gəlmisiniz! Welcome to Azerbaijan!" lövhəsidir.
Ermənistan Ombudsmanı bildirir ki, sözügedən lövhələr Qafandan Çakatenə gedən yolun kənarlarına vurulub. Yol isə müxtəlif kəndlərdən keçir və yaşayış məntəqələrini birləşdirir. Belə bir yolun kənarlarında lövhələrin olması, eyni zamanda Azərbaycan bayraqlarının sancılması Tatoyanın fikrincə, erməni əhalisinin hüquqlarının pozulmasıdır. O bu fikri sözləyərkən heç bir əsaslandırma aparmır.
Qeyd edək ki, ikinci Qarabağ müharibəsinədək Ermənistan sərhəddə çox yaxın ərazilərdə qanunsuz məskunlaşdırma həyata keçirib. Belə güman olunub ki, SSRİ dövründə sərhəddi müəyyənləşdirən xətlərin əhəmiyyəti yoxdur. Bunun özü isə beynəlxalq hüquqa əhəmiyyətsiz yanaşmadır ki, ondan Ermənistan Ombudsmanı söz açmır.
