Ermənistanın xarici işlər naziri Ara Ayvazyan ATƏT-in Minsk Qrupunun həmsədrlərini təmsil edən ölkələrin - Rusiyanın, Fransanın və ABŞ-ın Ermənistandakı səfirləri - Sergey Kopırkin, Conatan Lakot və Lin Treysi ilə görüş keçirib. "Baki-Baku.az" xəbər verir ki, bu barədə məlumatı Ermənistan XİN yayıb.
Məlumatda bildirilir ki, görüşdə müharibədən sonrakı dövrdə Dağlıq Qarabağ münaqişəsi bölgəsindəki vəziyyət müzakirə edilib və ATƏT-in Minsk Qrupunun həmsədrliyi ilə sülh prosesinin başlanmasının zəruriliyi vurğulanıb.
A.Ayvazyan nizamlamadakı əsas prinsiplərin reallaşdırılmasının vacibliyini deyib və bu zaman məsələyə Dağlıq Qarabağ xalqının öz müqəddaratını təyin etməsi və təhlükəsizliyi kontestində izah verib.
Ermənistan XİN rəhbəri 10 noyabr üçtərəfli bəyanatı üzərinə gələrək hərbi əsirlərin, girovların və digər saxlanılmış şəxslərin geri qaytarılmasından söz açıb.
Məlumatda həmçinin bildirilib ki, səfirlər Dağlıq Qarabağdakı yaranmış humanitar vəziyyətlə və Qarabağ xalqının ehtiyaclarının təmin edilməsi istiqamətində addımların atılması ilə əlaqədar fikir mübadiləsi aparıblar. Bu baxımdan beynəlxalq təşkilatların, xüsusən də BMT-nin və onun xüsusi agentliklərinin təmsilçilərinin maneəsiz olaraq əraziyə cəlb edilməsinin zəruriliyi vurğulanıb.
A.Ayvazyan həmçinin diqqəti Azərbaycanın nəzarəti altında olan ərazilərdəki erməni mədəni-tarixi və dini irsinin saxlanılmasının aktuallığına yönəldib və bildirib ki, Azərbaycan onların məhvinə çalışır.
