Noyabrın 6-da Azərbaycanın xarici işlər naziri Ceyhun Bayramov Rumıniya parlamenti Senatının sədri Nikolae Çuka ilə görüşüb.
Xarici İşlər Nazirliyinin Mətbuat xidməti idarəsindən bildiriblər ki, görüşdə Azərbaycan ilə Rumıniya arasında ikitərəfli, o cümlədən çoxtərəfli əməkdaşlıq gündəliyi, habelə regionda və dünyada mövcud vəziyyət müzakirə olunub.
Nazir Ceyhun Bayramov ölkəmizin müstəqilliyini tanıyan ilk ölkələrdən biri olan Rumıniya ilə ötən il diplomatik münasibətlərimizin 30 illiyinin qeyd edildiyini vurğulayaraq, bu illər ərzində ölkələrimiz arasında strateji tərəfdaşlıq münasibətlərinin inkişafında qarşılıqlı səfərlər, təmasların, o cümlədən parlament diplomatiyasının rolunu diqqətə çatdırıb. Bu istiqamətdə münasibətlərin daha da genişləndirilməsi məqsədilə iki ölkə arasında mövcud müqavilə-hüquq bazasının inkişafının zəruri olduğu vurğulanıb.
C.Bayramov Azərbaycan ilə Rumıniya arasında ikitərəfli münasibətlərin uğurlu inkişafı ilə yanaşı, regional və beynəlxalq təşkilatlar çərçivəsində dəstək və həmrəyliyə əsaslanan qarşılıqlı faydalı əməkdaşlığın mövcudluğunun təqdirəlayiq olduğunu qeyd edib.
İki ölkə arasında strateji tərəfdaşlığın bir sıra istiqamətlərində, xüsusilə ticarət dövriyyəsinin artırılması, iqtisadi, enerji, nəqliyyat, turizm, kənd təsərrüfatı və s. istiqamətlərdə əməkdaşlığın daha da genişləndirilməsinin əhəmiyyəti vurğulanıb. Alternativ enerji, rəqəmsal inkişaf sahələrində əməkdaşlığın inkişaf potensialı diqqətə çatdırılıb.
Görüş zamanı qarşı tərəf postmünaqişə dövründə bölgədə mövcud vəziyyət, Azərbaycanın yenidənqurma, reinteqrasiya və sülh quruculuğu fəaliyyəti barədə ətraflı məlumatlandırılıb. Nazir xüsusilə bu il sentyabrın 19-20-də Qarabağ bölgəsində Azərbaycan tərəfindən görülən və qeyri-qanuni erməni silahlı qüvvələrinin mövcudluğuna son qoyan antiterror tədbirlərindən sonra regionda reinteqrasiya, sülh gündəliyinin irəlilədilməsi üçün münbit şəraitin yarandığını vurğulayıb.
Mövcud çətinliklərə və çağırışlara baxmayaraq, ölkəmizin bundan sonra da Azərbaycan ilə Ermənistan arasında normallaşma və sülh prosesi üzrə əməli addımlar atmaqda qərarlı olduğu diqqətə çatdırılıb.
Senatın sədri Nikolae Çuka Rumıniyanın Baş naziri qismində ötən il Azərbaycan Prezidenti İlham Əliyevlə, cari ilin oktyabrında isə parlament Senatının sədri qismində Milli Məclisinin sədri Sahibə Qafarova ilə keçirdiyi görüşlərə istinad edərək, belə təmaslar çərçivəsində ikitərəfli münasibətlərin inkişaf perspektivlərinin müzakirəsinin əməkdaşlığa töhfə verdiyini bildirib. Rumıniyanın Cənubi Qafqazda sülh və təhlükəsizliyin bərqərar edilməsi istiqamətində Azərbaycanın səylərini dəstəklədiyi diqqətə çatdırılıb.
Görüş zamanı, həmçinin qarşılıqlı maraq doğuran digər məsələlər ətrafında fikir mübadiləsi aparılıb.
