Qarabağdakı separatçı rejimdə “seçki” oyunbazlığı oldu və gözlənildiyi kimi, uzun illər rejimin təhlükəsizlik xidməti deyilən saxta strukturda müxtəlif “vəzifələr” tutmuş Samvel Şahramanyan “prezident”liyə sahibləndi.
Seçki ilə paralel olaraq Ermənistan baş naziri Nikol Paşinyanın ABŞ Dövlət Departamentinin rəhbəri Entoni Blinkenə, Fransa Prezidenti Emmanuel Makrona, Almaniya Kansleri Olaf Şoltsa, Gürcüstanın baş naziri İrakli Qaribaşviliyə və İran Prezidenti İbrahim Rəisiyə telefon zəngləri etməsi, 2022-ci ilin oktyabrında Praqada və 2023-cü ilin mayında Brüsseldə əldə olunmuş razılıqlara sadiq qaldığını bildirməsi də diqqət çəkməkdədir.
Daha bir mühüm məqam Nikolun təcili şəkildə Azərbaycan Prezidenti İlham Əliyevlə görüşüb müzakirə aparmağa hazır olduğunu vurğulamasıdır. Qeyd edək ki, Paşinyan Avropa İttifaqı Şurasının prezidenti Şarl Mişelin vasitəçiliyi ilə keçirilmiş Praqa və Brüssel görüşlərindən sonra Azərbaycanın, Qarabağ da daxil olmaqla, 86,6 min kvadratkilometr ərazidə suveren hüquqlarını tanıdığını demişdi. O zaman sual yaranır: dünənki seçki nə idi? Suala cavab tapmağa çalışacağıq.
Hələlik Arayik Arutyunyanın bir müddət əvvəlki istefasından sonra S.Şahramanyanın qondarma rejimdə “prezident” seçilməsi məsələsi üzərində dayanaq. Mövcud xüsusda ilk yada düşən A.Arutyunyanın istefa əsnasında bildirdikləridir. O demişdi ki, bölgədə özü başda olmaqla, siyasi sistem təmsilçilərinin dəyişilməsinə ehtiyac var. Əlbəttə, Arayikin fikrini əsaslandırarkən, hansısa qloballıqdan dəm vurması populizmdən başqa bir şey deyildi.
Sistem dəyişikliyinə gəlincə, məlum olduğu kimi, Şahramanyan separatçıların keçmiş lideri Arkadi Qukasyanın adamıdır. Yəni, Koçaryan-Sarkisyan xuntasına yaxındır. Heç şübhəsiz ki, o, Arayikdən qalan hər şeyi silib-süpürüb atacaq. Amma önəmli olanı Qarabağdakı separatçılıq yuvasının özünün tam silib-süpürülməsidir ki, bunun üçün isə saxta seçki keçirməyə ehtiyac yox idi. İndiki halda seçki kimlərinsə mövcud müstəvidə dirəniş göstərdiyinin nümayişidir. Dirəniş varsa, ona cavab olmalıdır və mütləq olacaq. Paşinyan isə bilməlidir ki, dünya liderlərinə zəng etməklə, heç nə dəyişməyəcək. Çünki Azərbaycanın Xarici İşlər Nazirliyinin bəyanatında vurğulandığı kimi, ölkəmizin Qarabağ bölgəsində Ermənistanın işğalı nəticəsində yaradılmış qondarma rejimin “prezident seçkiləri” adı altında apardığı qanunsuz fəaliyyət Azərbaycan Konstitusiyası, qanunları və beynəlxalq hüququn norma və prinsiplərinin kobud şəkildə pozulmasıdır.
XİN-in bununla bağlı bəyanatında, eyni zamanda, bildirilib ki, qondarma rejim 30 ilə yaxın müddətdə davam etmiş təcavüz və etnik təmizləmə siyasətinin nəticəsidir. Yəni, bu rejim N.Paşinyanın bir həftə əvvəl İtaliyanın “La Repubblica” nəşrinə bildirdiyinin əksinə olaraq, heç də “Artsax xalqı” deyilən amorf varlığın iradəsinin məhsulu, onun “seçkili hakimiyyəti” filan deyil. “Azərbaycanın suveren ərazilərində yaradılmış və Ermənistanın hərbi, siyasi, maliyyə və digər dəstəyi sayəsində mövcudluğunu davam etdirməyə çalışan bu rejim tərəfindən atılan addımların heç bir qanuni qüvvəsi yoxdur” kimi fikirlərin ifadəsini tapdığı sənəddə saxta seçki oyunu İrəvanın son dövrdə xüsusilə kəskinləşən təxribatçı və təhrikedici fəaliyyətinin daha bir elementi, bölgədə normallaşma və etnik erməni sakinlərin ölkəmizin konstitusion çərçivəsinə reinteqrasiyası səylərinə ciddi zərbə olaraq qiymətləndirilib: “Qondarma “seçkilər”in keçirilməsi bir daha aydın şəkildə göstərir ki, status-kvonun saxlanılması, işğalçı siyasətinin davam etməsi üçün addımlar atan Ermənistan və onun yaratdığı qondarma rejim sülh prosesində, həqiqətən, maraqlı deyil və bunun əksinə, təxribat və vəziyyəti gərginləşdirmək yolunu tutub. Ermənistan öz xalqını və beynəlxalq ictimaiyyəti aldatmaq məqsədi daşıyan lüzumsuz cəhdlərindən əl çəkməli, Azərbaycanın suverenliyi və ərazi bütövlüyünə qarşı iddialara son qoymalı, normallaşma prosesində konstruktiv şəkildə iştirak etməli və beynəlxalq öhdəliklərinə əməl etməlidir. Ermənistanın Azərbaycanın öz suveren ərazisində yaşayan etnik ermənilər ilə dialoquna maneə olması Azərbaycan Respublikasının daxili işlərinə kobud müdaxilə, ölkəmizin suverenliyi və ərazi bütövlüyünə qarşı qəsddir. Azərbaycan Respublikası beynəlxalq səviyyədə tanınmış sərhədləri daxilində suverenliyi və ərazi bütövlüyünə qarşı törədilən təhdidlərin qarşısını qətiyyətlə alacaqdır. Bölgədə sülh və sabitliyə nail olmağın yeganə yolu erməni silahlı qüvvələrinin Azərbaycanın Qarabağ bölgəsindən qeyd-şərtsiz və tamamilə çıxarılması, qondarma rejimin buraxılmasıdır”.
Bəli, qondarma rejim gömülməlidir. Oxşar fikri A.Arutyunyanın istefa ilə bağlı açıqlamasından dərhal sonra Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev də bölüşmüşdü. Onun bildirdikləri rəsmi Bakının Qarabağdakı saxta siyasi sistemdə “kosmetik təmir” işlərini nəzərə almadığının təsdiqi idi.
Sonda əvvəldə haqqında vurğuladığımız məqamdan söz açaq. Həm dünənki “seçki”, həm də Paşinyanın dünya liderlərini telefon zəngləri ilə bezar etməsi, Qarabağdakı erməni separatizminin son çırpıntılarıdır. Nikolun telefon təmasları zamanı nəyi bildirməsindən asılı olmayaraq, aydındır ki, onun məsumluq jestləri rejimi gömülməkdən qurtarmaq cəhdindən başqa bir şey deyil. Erməni baş nazir, obrazlı desək, gömülmənin ayaq səslərinin eşidilməsindən duyuq düşüb. Buna görə də, öz aləmində hərəkətə keçib. Paşinyanın yadına ötən iki-üç ayda nəticələrini, faktiki olaraq, tanımadığı, haqqında, ümumiyyətlə, danışmadığı Praqa və Brüssel görüşlərini salması, heç şübhəsiz, vaxt udmaq cəhdidir. Bəli, erməni baş nazir çox aciz şəkildə vaxt udub bataqlıqda olan separatçı rejim üçün saman çöpü axtarışındadır. Amma çətin ki, o çöpü tapsın.
R.ƏVƏZ
