- Daxili siyasət
- 11:39 18.09.2024
Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu (KİVDF) tərəfindən jurnalistlər üçün xarici təlimçilərin iştirakı ilə onlayn formatda ikinci təlimlər keçirilib.
KİVDF-dən AZƏRTAC-a bildiriblər ki, “Rəqabətli xəbər istehsalı: xəbərin oxunaqlığının artırılması” mövzusunda onlayn təlim Türkiyənin tanınmış media təlimçisi – Marmara Universitetinin müəllimi, rəqəmsal media araşdırmaları, PR və kommunikasiya üzrə ekspert Ali Murat Kırık tərəfindən təqdim olunub.
Təlimdə rəqabətli xəbər istehsalının hazırlanmasından bəhs olunub, xəbərin oxunaqlığının artırılması üsulları nümayiş etdirilib, xəbər yazarkən və ya reportaj hazırlayarkən texnoloji vasitələrdən düzgün istifadə qaydaları barədə məlumat verilib. Daha sonra adıçəkilən mövzu üzrə media nümayəndələrinin sualları cavablandırılıb.
Qeyd edək ki, KİVDF tərəfindən təşkil olunan təlimdə televiziya, radio, onlayn media, qəzet və jurnalları təmsil edən 25-dən çox jurnalist iştirak edib.
Təlimlərlə bağlı ətraflı məlumat KİVDF-nin saytında yer alıb.