"Tarixin bütün sınaqlarından ləyaqətlə çıxmağı bacarmış Azərbaycan jurnalistikası bütün çətinliklərinə və məhrumiyyətlərinə rəğmən cəmiyyətin oturuşmuş ictimai institutu kimi özünü təsdiqləyib. Azərbaycan jurnalistikasının gücü onu həm qəbul edilməyə, həm də onunla hesablaşılmağa imkan verir. Cəmiyyət böyük ölçüdə peşəmizi ictimai maraq və mənafelərin qorunmasına yönələn mütərəqqi qüvvə olaraq görür, ona inam və etimad bəsləyir. Bütün bunları jurnalistika eyni zamanda həmrəyliyi ilə əldə edib". Bu fikirlər Azərbaycan Mətbuat Şurasının sədri Əflatun Amaşovun 8 sentyabr Jurnalistlərin Beynəlxalq Həmrəylik Günü münasibətilə media təmsilçilərinə ünvanladığı təbrikində yer alıb.
"Baki-Baku.az" xəbər verir ki, Ə.Amaşov facebook sosial şəbəkəsindəki hesabında paylaşdığı təbrik mətnində jurnalistikanı həmrəy olmağa məhkum peşə kimi dəyərləndirib. O bildirib ki, həmrəylik jurnalistikanın təbiətinə hakim kəsilmiş xarakterdir. "Bu günün Azərbaycan jurnalistikası isə həm də dövlətə, dövlətçiliyiyə sədaqət ruhuna köklənmiş həmrəylik nümunəsidir. Arzu edirəm ki, jurnalistlərimizin həmrəyliyi kimi qəbul edilən bütün tədbirlər bundan sonra da Vətənimiz Azərbaycanın inkişafına xismət etsin. Əminəm ki, belə də olacaq", - deyə Ə.Amaşov vurğulayıb.
