“Karabakh.Center” internet resursunun təqdimat mərasimi keçirilib.
APA-nın məlumatına görə, mərasimdə Qarabağ Dirçəliş Fondu İdarə Heyətinin sədri Rəhman Hacıyev, iqtisadiyyat naziri, Qarabağ Dirçəliş Fondunun Müşahidə Şurasının sədri Mikayıl Cabbarov, ekologiya və təbii sərvətlər naziri, Qarabağ Dirçəliş Fondunun Müşahidə Şurasının üzvü Muxtar Babayev və digər şəxslər iştirak ediblər.
Mərasimdə işğal nəticəsində Qarabağa dəymiş zərərin əks olunduğu foto-sərgiyə baxış keçirilib.
“Qarabağda Urbisid” - dağıntıların və zərərin miqyası haqqında video da nümayiş etdirilib.
Tədbirdə qeyd olunub ki, “Karabakh.Center” internet resursunun yaradılmasında məqsəd ermənilərin işğal müddətində törətdiyi dağıntıların, vurduğu ziyanın miqyasını dünya ictimaiyyətinə çatdırmaq, bu faciələrin, vandallıqların təkrarlanmamasının vacibliyi mesajını verməkdir.
