“50-150 nəfərlik toylarda qonaq olan şəxslər üçün maskadan istifadə ilə bağlı tələb yoxdur. Hətta musiqiçilər də maskadan istifadə etməyəcək. Yalnız Covid pasportunun olması tələb olunacaq. Amma 50 nəfərədək olan toylarda Covid pasportsuz iştirak mümkündür, yalnız maska taxmaq tələb olunur”.
Bu sözləri Yenisabah.az-a açıqlamasında Daxili İşlər Nazirliyinin Kütləvi informasiya və ictimaiyyətlə əlaqələr şöbəsinin rəisi Elşad Hacıyev deyib. Polis mayoru diqqətə çatdırıb ki, qanuna əsasən, iyunun 1-dən COVID-19 pasportu tətbiq olunan məkanlarda çalışan işçi heyətinin ən az 80 faizinin COVID-19 pasportuna malik olması mütləqdir:
“Eləcə də şənlik mərasimində xidmət göstərən heyətin musiqiçilər istisna olmaqla tibbi maskalardan, əlcəklərdən və digər qoruyucu vasitələrdən istifadəsi məcburidir.
İnzibati Xətalar Məcəlləsinin 211-ci - Epidemiya əleyhinə rejimin, sanitariya-gigiyena və karantin rejimlərinin pozulması maddəsinə görə, fiziki şəxslər qaydanı pozarsa, 200 manatdan 400 manatadək, vəzifəli şəxslər 4 min manatdan 5 min manatadək cərimə olunur və yaxud xətanı törədənin şəxsiyyəti nəzərə alınmaqla 1 aylıq müddətdə inzibati həbs tətbiq edilir. Hüquqi şəxslər üçün isə cərimə məbləği 5 min manatdan 10 mina manatadək müəyyənləşir”.
