Koronavirusa qarşı vaksinasiya pulsuz həyata keçiriləcək.
APA-nın məlumatına görə, bunu Operativ Qərargahın bu gün keçirilən brifinqində Səhiyyə nazirinin müavini Viktor Qasımov deyib.
“Hansı vaksinin daha tez üçüncü fazadan keçməsi ilə bağlı açıqlama veriləcəksə, onun ölkəyə gətirilməsinə çalışacağıq”, - deyən nazirin müavini Viktor Qasımovun sözlərinə görə, risk qrupları müəyyənləşdirilərək əhali vaksinasiyaya cəlb ediləcək.
TƏBİB-in İdarə Heyətinin sədri Ramin Bayramlı Azərbaycanda koronavirus vaksininin alınması üçün nə qədər vəsait ayrılacağı məsələsini şərh edib. Nazirlər Kabineti yanında Operativ Qərargahın brifinqində TƏBİB-in İdarə Heyətinin sədri bildirib ki, vaksin alınan zaman büdcədən nə qədər vəsait ayrılacağı şəffaf şəkildə ictimaiyyətə açıqlanacaq. “Necə ki, biz Koronavirusla Mübarizə Fondunun toplantısını keçirib orada vəsaiti açıqlamışdıq, bu məsələdə hər şey şəffaf olaraq açıqlanacaq”, - deyən R.Bayramlı əlavə edib ki, ilkin olaraq səhiyyə işçilərinə və 65 yaşdan yuxarı şəxslərə koronavirua qarşı vaksinlərin vurulması nəzərdə tutulur. Dünyada da bu təcrübədən istifadə edilir.
