- Daxili siyasət
- 12:40 07.09.2024
Kim danışsa da, gərək o danışmaya. Çünki təmsil etdiyi “dövlət” Azərbaycan əsgərinin qarşısında duruş gətirə bilməyəcəyini görəndə “özü özünü buraxaraq” dabanına tüpürüb qaçıb. Rəhbəri olduğu “ordu” isə bütün silah-sursatı dislokasiya yerində qoyaraq, “elliklə fərarilik” edib. Ona görə də bu adam dilini sakit saxlamalıdır. Amma, hələ də utanmır və gah Rusiyaya badalaq gəlməkdən danışır, gah Azərbaycanı üstələməkdən, gah da Avropa İttifaqı qarşısında şərtlər qoyur. Bu qədər həyasız olandan sonra danışmağa nə var ki?
Söhbət gorbagor edilərək tarixin zibilliyinə atılmış uydurma “dqr”-in keçmiş komandanı Samvel Babayandan gedir. Onun “А1+” telekanalına müsahibəsinin mətnini “yüksək qiymətləndirən” erməni jurnalist Naira Badalyan bu düşüncəsiz və köntöy adamın fikirlərini “Arminfo.am” saytına olduğu kimi verib ki, hamı bu sabiq “nazirin” təfəkkür səviyyəsi ilə tanış olsun.
Mayın 21-də adıçəkilən saytda verilmiş “Moskva bu gün Ankara ilə ikinci cəbhəni açmaq gücündə olmadığına görə Qafqazdan getməyə hazırdır” adlı yazıda oxuyuruq: “Onlar (Rusiyanı nəzərdə tutur –N.B.) 2012– 2013-cü illərdən başlayaraq 2-3 dəfə yazmırdılar ki, saxlamaq (yəni qorumaq–N.B.) istəmirlər (yəni, Ermənistanın sərhədlərini –N.B.), əgər ermənilər istəyirlərsə, qoy götürsünlər və qorusunlar (Ermənistan – Türkiyə və Ermənistan – İran sərhədlərini – N.B.). Mən bu barədə dəfələrlə bəyanat vermişdim. Bizim bu imkanlarımız yoxdur. Çünki həm maliyyə, həm də şəxsi heyət resurslarımız azdır, peşəkarlar saxlamaq lazımdır, onlar isə yüksək əməkhaqqı tələb edirlər”.
“Hətta bu gün ruslar xahiş edirlər ki, siz saxlayın (yəni sərhədləri qoruyun – N.B.) və çoxdan belədir. Əgər Ermənistan hakimiyyəti bunu səsləndirmirsə ... (üç nöqtə N.Badalyanındır – İ.M.). Bizim bu sahəyə məsul olan təhlükəsizlik xidmətimiz hələ 2012-ci ildən bu məzmunlu məktublar alır. Bununla belə rus sərhədçiləri “Zvartnots” aeroportunu Ermənistanın XAHİŞİ ( fərqləndirmə elementi bizimdir – İ.M.) ilə tərk ediblər, Ermənistan – Azərbaycan sərhədlərini isə Bakının TƏLƏBİ ilə”.
Samvel Babayanın fikrincə, ermənilərin “Artsax”dan çıxmasından sonra həm Rusiya sərhədçiləri, həm də sülhməramlılar “Artsax”dan və Ermənistandan çıxmalı idilər. Ancaq onlar (sülhməramlılar –N.B.) daha bir neçə ay “Artsax”da qalaraq sonrakı proseslərdə azərbaycanlılarla birlikdə iştirak etdilər.
“Ermənistan ərazisindəki 102-ci Rusiya hərbi bazasına gəlincə, həmin baza 1995-ci il martın 16-da Rusiya Federasiyası ilə Ermənistan Respublikası arasında imzalanmış müqavilə əsasında burada yerləşdirilmişdir və 2010-cu il 10 avqust tarixli razılaşma ilə onların mövcudluğu müddəti 2044-cü ilədək uzadılmışdır. Ona görə də baza məsələsinin rusların Ermənistandan getməsi prosesinə dəxli yoxdur (?! – İ.M.). Onlar ( Rusiya Federasiyası – N.B.) deyirlər – əgər istəyirsinizsə, biz tələsmədən gedə bilərik. Moskva regiondakı təsirini itirməkdən qorxmur”.
Babayanın fikrincə, Moskvanın Gürcüstan və Azərbaycan üzərində təsirini itirməsindən sonra Kremlin Ermənistana təsir etməsi o qədər də asan olmayacaq: “Qarabağ müharibəsi bunun sübutudur. Rusiya bu gün həmin ərazilərə görə Türkiyə ilə ikinci cəbhə açmağa hazır deyil. O Türkiyə ilə ki, bu gün Qafqaza və Mərkəzi Asiyaya tam nəzarət edir”.
Ermənistandakı Avropaya meyilli qüvvələrə üzünü tutan Samvel Babayan o məsələdə də gücü çatmayacaq daşı qaldırmağa cəhd edir: “ Qoy onlar (Avropa İttifaqı – N.B.) Ermənistanın 12 milyardlıq dövlət borcunu ( həmin məbləğin dollar, avro, yaxud dramla olduğunu deməyi unudur – İ.M.) da, Ermənistanın ödəməli olduğu 800 milyon dollar faiz borcunu da ləğv etsinlər. O zaman Ermənistanın sərhəd qoşunları respublikanın hüdudlarını bütün perimetrlər boyu qoruya bilərlər”. Çox maraqlıdır, “hökumət üzvü” olmuş bir adam anlamır ki, Avropa İttifaqı onun tələbi ilə hansısa məbləği mənasız bir dövlətə bağışlamaz.
Nəhayət, bizim əlavəmiz. Bu gün Ermənistanda davam edən xaotik proseslərdən bezmiş, son dörd ildəki rüsvayçılıqlardan yorulmuş bəzi aydın düşüncəli adamların, astadan olsa da, səsi eşidilir: “Biz ölkəmizdən uzaqdakı “dostların” vədlərini bir kənara qoyaraq, Azərbaycan və Türkiyə ilə münasibətləri normallaşdırmalıyıq. Əks– təqdirdə erməni insanının həyatında problemlər çox olacaq”.
Hətta ziyalılardan biri deyib ki, biz Ermənistana da “Artsax”ın taleyini yaşatmamaq üçün vəziyyəti açıq başla qiymətləndirməyi bacarmalıyıq.
Haqlı mövqedir. Ancaq biz bunu heç kəsə deyə bilmərik. Çünki dövlət başçımızın qənaəti olduqca aydındır: “Biz heç bir ölkənin daxili işlərinə qarışmayacağıq və kiminsə bizim daxili işlərimizə qarışmasına imkan verməyəcəyik”.
İttifaq MİRZƏBƏYLİ