- Daxili siyasət
- 12:40 07.09.2024
Ermənistan düz yolda deyil. Bütün gücünü postmüharibə dövrünün reallıqlarına uyğunlaşdırmağa yönəltmək əvəzinə, qeyri-regional ölkələrlə separat danışıqlara girir, ABŞ və Avropa İttifaqının arxasında gizlənərək, dumanlı məqsədlərinə çatmaq istəyir.
Əlbəttə, İrəvanın planı məlumdur: Ermənistan Qərbin köməyinə ümid edərək, Azərbaycanla davamlı sülhün imzalanmasını uzatmağa və güc toplayaraq yenidən xəyali arzularını reallaşdırmağa can atır. Aprelin 5-də Antoni Blinken, Ursula Fon der Lyayen və Nikol Paşinyan arasında Brüsseldə keçirilən görüş İrəvanın məhz bu niyyətindən xəbər verir. Amma İrəvan unudur ki, qonşuya ümid olan şamsız qalar. Azərbaycan heç zaman regionda formalaşan yeni geosiyasi reallığın dəyişdirilməsinə imkan verməyəcək.
Aprelin 3-də ABŞ Dövlət katibi Antoni Blinkenin Prezident İlham Əliyevə zəng etməsi barədə məlumat vermişdik. Dövlət başçımızla telefon danışında ABŞ-ın planlaşdırılan görüşlə bağlı mövqeyini izah etməyə çalışmasını da diqqətə çatdırmışdır. Həmin telefon danışından bir gün sonra, yəni aprelin 4-də Avropa Komissiyasının Prezidenti Ursula Fon der Lyayen Prezident İlham Əliyevə zəng etdi. Telefon danışığında aprelin 5-də Brüsseldə keçiriləcək üçtərəfli görüş məsələsi müzakirə olunub. Prezident İlham Əliyev ABŞ Dövlət katibi Antoni Blinken ilə müzakirə olunduğu kimi, bu görüşlə bağlı Azərbaycan tərəfinin mövqeyini ifadə edib və regional inklüzivliyin vacibliyini bildirib. Əlbəttə, dünyanın ikinci güc mərkəzi sayılan Avropa İttifaqı rəsmisinin dövlət başçımıza zəng etməsi və Birləşmiş Ştatların ardından “Köhnə qitə”nin görüşlə bağlı mövqeyini izah etməyə çalışması Prezident İlham Əliyevin qlobal müstəvidə nüfuzunun və çəkisinin göstəricisi kimi qiymətləndirilməlidir. Bununla belə, Aİ də ABŞ kimi anlamalıdır ki, görüşün regional inklüzivliyinin olmaması özündə böyük təhlükələr daşıyır. Dövlət başçımız ABŞ Dövlət katibi ilə telefon danışığında bununla bağlı xəbərdarlığını da edib.
Aprelin 5-də keçirilməsi nəzərdə tutulan görüş Türkiyə və Rusiyada da narahatlıqla qarşılanır. Bakı Ermənistanla yekun sülh müqaviləsinin imzalanmasında maraqlıdır. Ermənistan isə hələ də imitasiya ilə məşğuldur. İrəvanın ərköyünləşməsinə də Qərb rəvac verir. ABŞ, Avropa İttifaqı və xüsusilə də Fransa Ermənistanı öz şərtləri əsasında sülh sazişi bağlaya biləcəyinə ümid etməyə sövq edir. Təbii ki, bununla Qərb sülh sazişinin bağlanmasına mane olur. Tərəfsizliyini geosiyasi planlarına qurban verən ABŞ və Aİ regionu yenidən “barıt çəlləyi”nə döndərmək istəyir. Təbii ki, Qərbi, ümumiyyətlə, Ermənistan maraqlandırmır. Onların vəzifəsi Cənubi Qafqaza daxil olmaq və regionda Rusiyaya qarşı yeni platsdarma yaratmağa çalışmaqdır. İrəvan da Qərbin əlində belə alətə çevrilməyə razıdır. Amma Azərbaycanın heç bir halda Ermənistanın yenidən baş qaldırmasına və regionda yeni münaqişə ocağının yaranmasına yol verməyəcəyi birmənalıdır.
Azərbaycan ədalətli sülh istəyir, regionu birləşdirən fəaliyyəti dəstəkləyir. Bunun əksini düşünənlər isə əməllərinə görə yaranacaq arzuolunmaz vəziyyətə görə məsuliyyəti bölüşməli olacaqlar.
M.SƏBUHİ