Səhiyyə Nazirliyi Elmi-Tədqiqat Mamalıq və Ginekologiya İnstitutunun dosenti, tibb üzrə fəlsəfə doktoru, fəal səhiyyə ictimaiyyətçisi Xəyalə Təhməzi sosial media hesablarında işğaldan azad olunan Qarabağ ərazisində səhiyyə strukturunun, tibbi xidmətin qurulmasına dair fikirlərini bölüşüb.
X.Təhməzi bildirib ki, bu gün dövlətimiz üçün ən aktual məsələ təqribən 30 ilə yaxın bir zamandaan sonra işğaldan azad olunan, mənfur düşmənin dağıtdığı, viran qoyduğu ərazilərdə, rayonlarda yeni infrastrukturun qurulması, yeni iş yerlərinin açılması, müasir yaşayış komplekslərinin tikintisi, öz doğma torpağına, kəndinə, şəhərinə dönəcək insanlara ən yüksək səviyyədə tibbi xidmətin göstərilməsinə şəraitin yaradılmasıdır. Qarabağın abadlaşması və yerli sakinlərin öz doğma torpaqlarına qayıtması tək dövlətin və məcburi köçkünlərin deyil, bütün ölkə ictimaiyyətinin diqqətindədir. Əlbəttə, aparılan danışıqlar, həyata keçirilən layihələrdən aydın göründüyü kimi bu məsələlər dövlət başçısı üçün əsas prioritetdir. Təbii ki, bu belə də olacaq. "Kitab-i Dədə Qorqud"da deyildiyi kimi "Torpağı qorumasan, əkib-becərməyə dəyməz, əkib-becərməyəcəksən qorumağa dəyməz". Təqribən XVI yüzillikdə deyilmiş bu ifadə bütün dövrlərdə olduğu kimi, bu gün də aktuallığını saxlamaqdadır. 27-28 ildir ki, xalqımız tarixi torpaqlarımızın işğaldan azad olunmasını həsrətlə gözləyir. Artıq 1 milyona yaxın məcburi köçkünlərin torpaq həsrətinə son qoyuldu. Əsas məsələ əzəli torpaqlarımızın mənfur düşmən tapdağından təmizlənməsi idi. Şükr ki, bu gün quruculuq işləri ilə bağlı yeniliklərin şahidiyik. Bu baxımdan Qarabağda sürətli dəyişiklikləri diqqətlə izləyir və biz həkimlər zamanı çatanda böyük məhəbbətlə, həvəslə xidmət göstərməyi gözləyirik. Təbii ki, dövlət və qeyri-dövlət strukturlarının, kənd təsərrüfatının, səhiyyə strukturunun qurulması, müxtəlif sahələrin, eyni zamanda müasir xəstəxanaların tikilməsi, avadanlıqlarla təchiz olunması, yüksək ixtisaslı mütəxəssislərlə təchiz olunmuş klinikaların yaradılması, həsrətlə gözləyən yerli sakinlərin köçürülməsi qarşıda duran ən vacib məsələlərdəndir. Tibbi infrastrukturun yaradılmasında bir həkim olaraq hər birimiz maraqlıyıq və xüsusilə reproduktiv sağlamlığı təmin edəcək doğum evlərinin, qadın məsləhətxanalarının, ailə-sağlamlıq mərkəzlərinin qurulması ilə bağlı nəticələri səbrsizliklə gözləyirik. Bu işlərin həyata keçirilməsinin ən vacib tərəfi əhalinin artımına nail olmaq, doğma torpaqlarında doğulan yeni nəsil övladların sağlamlığını təmin etməkdir. Bu baxımdan reproduktiv sağlamlığın təmin olunması, qorunması mütləqdir. “Reproduktiv sağlamlığın qorunması haqqında” qanun layihəsində kompleks nəzərdə tutulan maddələrin həyata keçirilməsi həm bölgələrdə anaların, ailələrin maariflənməsini, sağlam uşaqların doğulmasını təmin edəcək, həm də ana-uşaqların müdafiəsini gücləndirəcək.
