Rusiyada koronavirusdan rekord ölüm sayı qeydə alınıb

Rusiyada son sutka ərzində daha 23 218 nəfər yeni növ koronavirusa (COVID-19) yoluxub.

APA-nın Moskva müxbirinin Operativ Qərargaha istinadən verdiyi məlumata görə, Rusiyada COVID-19-a yoluxanların sayı 5 561 360 nəfərə çatıb.

Son sutka ərzində Rusiyada 629 nəfərin koronavirusdan öldüyü bildirilib. Bu, pandemiya dövründə ölkədə indiyə qədər qeydə alınan ən çox ölüm halıdır. Ümumilikdə Rusiyada COVID-19-dan ölənlərin sayı 136 565 nəfərə çatıb.

Qeyd edək ki, Rusiya koronavirusa yoluxmaların sayına görə dünyada ABŞ, Hindistan, Braziliya, Fransa və Türkiyədən sonra altıncı yerdə gəlir.