- Daxili siyasət
- 12:40 07.09.2024
Sentyabrın 9-da Xətai rayon Heydər Əliyev parkının Amfiteatr səhnəsində “Hello İxtisaslaşdırma və İnkişaf Mərkəzi”, Xətai rayon İcra Hakimiyyəti və “Azərbaycan Qan Donorluğunun İnkişafı Mərkəzi”- nin birgə tərəfdaşlığı ilə inklüzivliyin səsini hər kəsə çatdırmaq məqsədilə “Mən də bir ULDUZAM” adlı konsert proqramı həyata keçiriləcək.
Tədbir Ümummilli Lider Heydər Əliyevin anadan olmasının 100-cü ildönümünə həsr olunur. İki hissədən ibarət olan proqramda ilk olaraq saat 17:00-dan inklüzivliyi olan şəxslərin əl işlərindən ibarət sərgi-satış yarmarkası, həmçinin saat 19:00-da isə həssas qrupdan olan şəxslərin tanınmış müğənilərlə birlikdə konsert proqramı keçiriləcək.
AQDİM-nin mətbuat xidmətinin verdiyi məlumata əsasən layihənin başlıca ideyası əlilliyi olan, irsi qan xəstəliyindən əziyyət çəkən, həmçinin digər həssas sosial qruplara aid olan şəxsləri bir araya gətirmək, onların cəmiyyətə qazandırılmasını və inteqrasiyasını təmin etməkdir. Həmçinin istedad və bacarıqlarını nümayiş etdirmək, onların əl işlərini tanıtmaq, o cümlədən onların əyləncəli bir gün keçirmələrinə xidmət etməkdir.
Giriş sərbəstdir.