İtaliyanın “in20righe” portalı Heydər Əliyev Fondu və Mədəniyyət Nazirliyinin təşkilatçılığı ilə Bakıda keçirilən “Mədəni irs” Forumu haqqında məqalə dərc edib.
AZƏRTAC xəbər verir ki, yazıda son illər Azərbaycanın mədəni irsinin qorunub saxlanılması və bərpası istiqamətində görülən işlər qeyd olunur. Bildirilir ki, işğaldan azad olunmuş Qarabağ və Şərqi Zəngəzurda 705 tarix və mədəniyyət abidəsi dövlət qeydiyyatına alınıb. 2020-2022-ci illərdə 433 tarix-mədəniyyət abidəsinə baxış keçirilib, tarixi, memarlıq, arxeoloji əlamət daşıyan 182 yeni aşkar olunmuş abidənin monitorinqi aparılıb.
Şuşa şəhəri üçün layihələndirilmiş Baş plan, Ağdamda inşa ediləcək İşğal və Zəfər Muzey Kompleksləri, Qazax Müəllimlər Seminariyasında keçirilən təmir-bərpa işləri barədə məlumat verilir.
Yazıda, həmçinin Azərbaycan Milli Xalça Muzeyinin ölkənin ilk inklüziv muzeyi olduğu, İçərişəhərdə yerləşən Cümə məscidinin tarixi əhəmiyyəti, Azərbaycanın ənənəvi xalçaçılıq sənətinin 2010-cu ildən UNESCO-nun Qeyri-maddi mədəni irs üzrə reprezentativ siyahısına daxil edildiyi vurğulanır.
Nihad Budaqov
AZƏRTAC-ın xüsusi müxbiri
Roma
