Xalq artisti, Əməkdar incəsənət xadimi, Prezidentin fərdi təqaüdçüsü, “Şöhrət” və “Şərəf” ordenli professor Tofiq Bakıxanova həsr olunmuş kataloqun təqdimat mərasimi olub.
Milli Azərbaycan Tarixi Muzeyinin akt zalında təşkil olunmuş tədbirdə həm görkəmli bəstəkar Tofiq Bakıxanovun 3 il əvvəl bu muzeyə bağışladığı şəxsi əşyalarının bir hissəsindən ibarət sərgiyə tamaşa etdik. Sonra Bakıxanovlar şəcərəsinin sonuncu mogikanı haqqında akademik çıxışlar və videoçarx dinlənildi. Tədbirin bədii hissəsində tanınmış sənət adamları bəstəkarın əsərlərini ifa etdilər.
Muzeyin direktoru, akademik Nailə Vəlixanlı 94 yaşlı tanınmış bəstəkar Tofiq Bakıxanovun əvəzolunmaz yaradıcılıq fəaliyyəti barədə məlumat verərək xatırlatdı ki, təqdim olunan kataloqa professorun fotoşəkilləri, sənədləri, şəxsi əşyaları və digər sənədlər daxil edilib. Sonra Tofiq Bakıxanov bu tədbirin təşkilinə, həmçinin, kataloqun ərsəyə gəlməsinə görə muzey rəhbərliyinə və əməkdaşlara təşəkkürünü bildirib.
Muzeyin Sənədli Mənbələrin elmi fond şöbəsinin müdiri, qeyd olunan kataloqun həmmüəllifi Esmira Rəhimova isə bəstəkar Tofiq Bakıxanovun həyat və fəaliyyəti haqqında geniş məlumat verdi. Eləcə də tədbirin bədii hissəsində Respublika və Beynəlxalq miqyaslı müsabiqələrin laureatları – Kəmalə Mirbabayeva, Leyla Dadaşova, Firuzə Qədimalıyeva və Hüseynağa Səmədovun ifasında musiqi nömrələri səsləndirildi.
İttifaq MİRZƏBƏYLİ
